Соңғы муза

Хабардың мақсаты қазақ теледидарының тарихында алғаш рет, қазақ тілді көрерменнің назарына әлемдік, авторлық кино жауһарларын ұсыну.

Әдетте бұл фильмдер кинопрокаттан орын алмайды, себебі оларды сатып алу коммерциялық тұрғыдан тиімсіз. Алайда, әлемдік кино сынында бұл туындылар нағыз өнер туындылары ретінде мойындалған.

Хабардың мақсаты авторлық кино деп аталатын күрделі жанрға аудитория дайындау, жас кино мамандарға осы сала мәселелерін, сол арқылы отандық кино мәселелерін талқылауға мүмкіндік беру. Интеллектуал кино проблемаларын талқылайтын орта қалыптастыру. Әрі бұл әңгімеге атақты «мэтрларды» ғана емес, жас аудиторияны да баулу.

Хабар барысында көрерменнің назарына әлемдік классика ұсынылып қана қоймайды, алдын ала көрерменге сол туындының немесе сол автордың кино тарихындағы алар орны, маңызы, феномені бүге-шігелі түсіндіріледі. Әлемдік сыншылардың пікірлері ұсынылады. Кино тілінің аллегориясы, оператор жұмысының ерекшеліктері, монтаж барысында пайдаланылған әдістер кәсіби тұрғыдан түсіндіріледі.