Өнер өлшемі

Өнер табыс көзіне айналып, қазіргі тілмен айтқанда, қаржы өніміне айналғанына біршама уақыт болды. Батыста бастау алған нарықтың бұл саласы тек коллекционерлерге, аукционды үйлерге, галерея иелеріне ғана пайда түсірмейді. Арт-нарық - инвестициялық қорлардың, банктер мен ірі корпорациялардың табыс көзі. Бүгінгі таңда өнердің құны 3 көрсеткішпен өлшенеді: имидж, ликвидтік және инвестициялық тартымдылық. Алайда, белгілі бір өнер туындысының бағасы қалай қалыптасады деген сауалға экономистердің өзі нақты жауап бере алмайды. Десе де, заман ауысып, талғам өзгергеніне қарамастан, шынайы өнер туындысы ешқашан құндылығын жоғалтпайды. Сол себепті, бұл жоба құдыреті күшті өнердің уақытқа бағынбайтын бірегейлігін, әрдайым сұранысқа ие айрықша қасиетін тілге тиек етеді.