Түркі әлемі

Түркі әлемі – әлемдегі түркітектес 40-қа жуық ұлт пен ұлысты, жалпы 170 миллион халықты біріктіреді. Түркілер тарихы біздің заманымызға дейінгі 3000-4000 жыл бұрын басталады. Еуразия құрлығын тұтас алып жатқан түркі жұртының мыңдаған жыл ішінде әлемдік өркениеттің дамуына қосқан үлесін аз емес. Мәселен, байырғы түркілер алғаш болып далалық империя құрды, түркі қағандықтары мен мемлекеттері соғыс өнері мен урбанистикалық мәдениетті жүйеледі. Далалық мәдениетке тән көшпелі шаруашылық негізін қалап, төл жазуын қалыптастырды. Көне түркілер аспан денелерінің қозғалысына карап ауа райын, жыл маусымдарының қандай болатынын күні бұрын анықтай алған. Көне түркілер геометрия, математика ғылымдарынан хабардар болған, оны су жүйелерін салуға, күрделі ғимараттар, карауыл төбелер тұрғызуға, т.б. пайдаланған. Металды, түрлі минералдарды еріту әдістерін, шөптердің емдік қасиеттерін білген. Емдеудің неше түрлі тәсілдерін де жетік меңгерген. Бірақ, осындай жетістіктер бола тұра, евроцентристік көз-қарас көлеңкесінде қалып қойып жатыр. Бағдарлама осы жетістіктерді паш етуді, сол арқылы түркі жұртының да өткен тарихы үшін мақтаныш сезімін оятуды көздейді.